កងទ័ពអ៊ីស្រាអែល កំពុងវាយលុកទីក្រុង Jenin នៅតំបន់ West Bank របស់ប៉ាឡេស្ទីន ដោយប្រើយន្តហោះគ្មានមនុស្សបើក និងឧបករណ៍ធុនធ្ងន់។ នេះបើយោងតាមប៉ុស្តិ៍ទូរទស្សន៍ Al Mayadeen របស់ប្រទេសលីបង់ បានរាយការណ៍។
យោងតាមប្រភព បញ្ជាក់ថា យោធាអ៊ីស្រាអែល កំពុងធ្វើការប្រយុទ្ធគ្នាយ៉ាងខ្លាំងជាមួយកម្លាំងតស៊ូប៉ាឡេស្ទីន ដោយយន្តហោះគ្មានមនុស្សបើកមួយចំនួនធំកំពុងហោះហើរនៅលើមេឃក្នុងទីក្រុង ហើយផ្លូវ និងហេដ្ឋារចនាសម្ព័ន្ធ កំពុងត្រូវបំផ្លាញដោយការឈូសឆាយរបស់កងទ័ពធុនធ្ងន់។
គួរបញ្ជាក់ថា ភាពតានតឹងបានផ្ទុះឡើងម្តងទៀតនៅមជ្ឈិមបូព៌ា នៅថ្ងៃទី ៧ ខែតុលាឆ្នាំ ២០២៣ នៅពេលដែលពួកសកម្មប្រយុទ្ធមកពីចលនាប៉ាឡេស្ទីនរ៉ាឌីកាល់ដែលមានមូលដ្ឋាននៅហ្គាហ្សាស្ទ្រីប ហាម៉ាស ធ្វើការវាយប្រហារដ៏គួរឱ្យភ្ញាក់ផ្អើលមួយលើទឹកដីអ៊ីស្រាអែល ពីតំបន់ហ្គាហ្សាដោយសម្លាប់អ្នករស់នៅតាមព្រំដែនអ៊ីស្រាអែល និងចាប់ចំណាប់ខ្មាំងរួមទាំងស្ត្រី កុមារ និងមនុស្សចាស់៕
