កីឡា៖ អភិបាលក្រុងប៉ារីស លោកស្រី Anne Hidalgo បាននិយាយកាលពីម្សិលមិញថា អត្តពលិករុស្ស៊ី និងបេឡារុស្ស “មិនត្រូវបានស្វាគមន៍” នៅក្នុងព្រឹត្តិការណ៍កីឡាអូឡាំពិកដែលត្រូវបានរៀបចំឡើងក្នុងរដ្ឋធានីបារាំងនៅឆ្នាំនេះនោះទេ។
«ខ្ញុំចង់ប្រាប់អត្តពលិករុស្ស៊ី និងបេឡារុស្សថា ពួកគេមិនស្វាគមន៍នៅទីក្រុងប៉ារីសទេ។ ខ្ញុំក៏ចង់ប្រាប់អត្តពលិកអ៊ុយក្រែន និងប្រជាជនអ៊ុយក្រែនទាំងអស់ថា យើងគាំទ្រពួកគេខ្លាំងណាស់»។ លោកស្រី Hidalgo បានលើកឡើងបែបនេះក្នុងការធ្វើដំណើរទៅកាន់ទីក្រុងគៀវ ជាកន្លែងដែលលោកស្រីបានទៅទស្សនាមជ្ឈមណ្ឌលហ្វឹកហាត់សម្រាប់អត្តពលិកអ៊ុយក្រែន។
អត្តពលិករុស្ស៊ីត្រូវបានអនុញ្ញាតឱ្យចូលរួមប្រកួតនៅកីឡាអូឡាំពិកទីក្រុងប៉ារីសដែលដំណើរការចាប់ពីថ្ងៃទី២៦ ខែកក្កដា ដល់ថ្ងៃទី១១ ខែសីហា ប៉ុន្តែសម្រាប់តែអត្តពលិកអព្យាក្រឹតប៉ុណ្ណោះ។ ប្រទេសទាំងពីរត្រូវបានហាមឃាត់ពីការចូលរួមក្នុងពិធីបើកដែលនឹងប្រព្រឹត្តទៅនៅលើដងទន្លេសេន Seine កណ្តាលទីក្រុងផងដែរ៕
