អង្គភាពឆ្មាំបដិវត្តន៍បានឲ្យដឹងនៅក្នុងសេចក្តីថ្លែងការណ៍មួយចេញផ្សាយដោយទីភ្នាក់ងារសារព័ត៌មាន IRNA ថា ប្រទេសអ៊ីរ៉ង់បានចាប់ផ្តើមធ្វើការវាយប្រហារដោយមីស៊ីល និងយន្តហោះគ្មានមនុស្សបើកក្នុងទ្រង់ទ្រាយធំដោយជោគជ័យប្រឆាំងនឹងអ៊ីស្រាអែល។ យោធារបស់សាធារណរដ្ឋឥស្លាមបានគ្រប់គ្រងការវាយលុក និងបំផ្លាញ គោលដៅយោធាសំខាន់ៗរបស់អ៊ីស្រាអែល តែមិនបានផ្តល់ព័ត៌មានលម្អិតបន្ថែមនោះទេ។
ការវាយប្រហារនេះគឺជាការឆ្លើយតបទៅនឹងអ្វីដែលទីក្រុងតេអេរ៉ង់ហៅថា “ឧក្រិដ្ឋកម្មជាច្រើន” ដែលប្រព្រឹត្តដោយទីក្រុងហ្សេរុយសាឡឹមខាងលិច រួមទាំងការវាយប្រហាររបស់អ៊ីស្រាអែលលើស្ថានកុងស៊ុលអ៊ីរ៉ង់នៅរដ្ឋធានីដាម៉ាសរបស់ប្រទេសស៊ីរីផងដែរ។ ការវាយប្រហារដែលបានកើតឡើងនៅថ្ងៃទី ១ ខែមេសាកន្លងទៅបានសម្លាប់មន្ត្រី ៧ នាក់នៃកងកម្លាំង Quds របស់ IRGC រួមទាំងឧត្តមសេនីយ៍ពីរនាក់របស់អ៊ីរ៉ង់ផងដែរ។
ប្រព័ន្ធផ្សព្វផ្សាយអ៊ីស្រាអែល និងលោកខាងលិចបានរាយការណ៍ថា ការវាយប្រហាររបស់សាធារណរដ្ឋអ៊ីស្លាមពាក់ព័ន្ធនឹងយន្តហោះគ្មានមនុស្សបើកជាង ១០០ គ្រឿង ។ កងកម្លាំងការពារអ៊ីស្រាអែល (IDF) បានឲ្យដឹងដែរថា ខ្លួនបានតាមដានយន្តហោះគ្មានមនុស្សបើកដែលចូលមក ហើយស្ទាក់ចាប់ពួកគេនៅកណ្តាលអាកាស ដោយមានជំនួយពីកងកម្លាំងសម្ព័ន្ធមិត្ត។
ប្រព័ន្ធផ្សព្វផ្សាយអ៊ីរ៉ង់បានផ្សព្វផ្សាយឃ្លីបខ្លីៗជាច្រើននៅលើប្រព័ន្ធផ្សព្វផ្សាយសង្គមដែលបង្ហាញពីពេលវេលាដែលមីស៊ីលបានវាយប្រហារគោលដៅរបស់ពួកគេនៅក្នុងប្រទេសអ៊ីស្រាអែល ខណដែលគេដឹងថាបានមកតាំងជានបន្ទាយយោធាដ៏រឹងមាំនៅលើវាលខ្សាច់ Negev នៅភាគខាងត្បូងនៃប្រទេស៕
