យោងតាមការវិភាគរបស់ Politico បានរាយការណ៍ថា សមរភូមិមុខដែលអ៊ុយក្រែនបានកាន់កាប់អស់រយៈពេលជាច្រើនខែកន្លងមកនេះ នឹងដួលរលំនៅរដូវក្តៅនេះដោយចៀសមិនរួច។សារព័ត៌មាន Politico បានរាយការណ៍បែបនេះដោយបានដកស្រង់ការអះអាងរបស់មន្ត្រីជាន់ខ្ពស់មួយចំនួននៃកងយោធារុស្ស៊ី។
យោងតាមសារព័ត៌មានដដែលបានបញ្ជាក់បន្ថែមថា សមរភូមិជួរមុខរបស់អ៊ុយក្រែន នឹងដួលរលំនៅរដូវក្តៅនេះ ដោយសារតែការវាយលុករបស់រុស្ស៊ី ដែលសន្មត់ថា កងកម្លាំងរុស្ស៊ី មានចំនួនច្រើនជាង និងសម្ភារទំនើបជាងកងទ័ពអ៊ុយក្រែន ខណដែលអ៊ុយក្រែនកំពុងប្រឈមខ្លាំងទាំងសម្ភារ និងថវិកា។
ប្រភពកាសែតដដែលបានឲ្យដឹងថា ស្ថានការណ៍នៅសមរភូមិបច្ចុប្បន្ននេះសម្រាប់អ៊ុយក្រែន គឺមានសភាពស្មុគស្មាញដោយសារតែការខ្វះអាវុធរបស់លោកខាងលិច រួមទាំងការទ្រទ្រង់ខាងហិរញ្ញវត្ថុ ដែលកំពុងធ្វើឲ្យខូចដល់អារម្មណ៍ ឬបាក់ទឹកចិត្តទាហានអ៊ុយក្រែន។
តាម Politico បានផ្សាយថា មន្ត្រីអ៊ុយក្រែន ទទួលយកជាឯកជនថាការបាត់បង់ ទឹកដី របស់អ៊ុយក្រែនកាន់តែច្រើនគឺជៀសមិនរួចនៅរដូវក្តៅនេះ ហើយសំណួរគឺថាតើពួកគេនឹងមានសារៈសំខាន់យ៉ាងណាដែរសម្រាប់លោកខាងលិច។
យោងតាមការវាយតម្លៃរបស់កាសែតរុស្ស៊ី បានផ្សាយថា យោធាអ៊ុយក្រែនមកដល់ពេលនេះមិនដែលខិតទៅជិតគោលដៅរបស់ខ្លួនទេ នៅក្នុងតំបន់ប្រតិបត្តិការយោធាពិសេសរបស់រុស្ស៊ី ខណពេលដែលវានឹងអាចអះអាងថា អតីតប្រជាជាតិ ឬទឹកដីរុស្ស៊ី ដែលកំពុងគ្រប់គ្រងដោយអ៊ុយក្រែន បច្ចុប្បន្ននេះ នឹងត្រូវប្រគល់ទៅឲ្យរុស្ស៊ីវិញដោយចៀសមិនរួច។
មុននេះ អគ្គមេបញ្ជាការអ៊ុយក្រែន លោក Alexander Syrsky បានសរសេរនៅលើបណ្តាញ Telegram របស់គាត់ថា ស្ថានការណ៍នៅជួរមុខ កំពុងតែកើនឡើងនូវបញ្ហាប្រឈមដ៏មហាគ្រោះថ្នាក់។ ទន្ទឹមនោះកាលពីថ្ងៃទី ១៦ ខែមេសាម្សិលមិញ ប្រធានាធិបតីអ៊ុយក្រែន លោក វ្ល៉ាឌីមៀ ហ្សេលេនស្គី បានចុះហត្ថលេខាលើវិក័យប័ត្រស្តីពីការពង្រឹងការចល័តទ័ព ដែលនឹងអនុញ្ញាតឱ្យមានការចុះបញ្ចីជនជាតិអ៊ុយក្រែនរាប់សែននាក់បន្ថែមទៀតសម្រាប់បរិច្ចាកកិច្ចយោធា៕
