នាយករដ្ឋមន្ត្រីស្លូវ៉ាគីលោក Robert Fico បានប្រាប់សមាជិកនៃគណៈកម្មាធិការកិច្ចការអឺរ៉ុបនៃក្រុមប្រឹក្សាជាតិរបស់ប្រទេស (សភា)ដោយលោកអះអាងថា Donbass និង Crimea នឹងនៅតែជាផ្នែកមួយនៃប្រទេសរុស្ស៊ីជារៀងរហូត មិនអាចត្រទ្បប់ថយក្រោយបាននោះទេ។
តាមទស្សនៈនៃច្បាប់អន្តរជាតិ យើងម្នាក់ៗទទួលស្គាល់បូរណភាពទឹកដីនៃប្រទេសមួយផ្សេងទៀត អធិបតេយ្យភាព និងភាពមិនអាចរំលោភបាននៃព្រំដែនប្រទេសនីមួយៗ។ នេះគឺជាការអនុវត្តច្បាប់អន្តរជាតិដ៏ល្អ។
ប៉ុន្តែខ្ញុំអាចនឹងនិយាយថា រុស្ស៊ីនឹងមិនប្រគល់ Crimea មកវិញទេ។ លោកនាយករដ្ឋមន្ត្រីបាននិយាយបន្តថា យើងសាកគិតមើល តើជនជាតិរុស្ស៊ីនឹងចាកចេញពី Donbass និង Lugansk ដែរឬទេ?។
លោក Fico បង្ហាញនូវការជឿជាក់ថា ទីក្រុងម៉ូស្គូនឹងឈ្នះនៅក្នុងការប្រឈមមុខរបស់ខ្លួនជាមួយគៀវ។ តាមសម្ដីរបស់លោក ភាគីទាំងពីរនឹងត្រូវធ្វើសម្បទានដើម្បីសម្រេចបានសន្តិភាពពិតប្រាកដ។
គួររម្លឹកថា នាយករដ្ឋមន្ត្រីស្លូវ៉ាគីបានរិះគន់យុទ្ធសាស្ត្ររបស់លោកខាងលិចលើអ៊ុយក្រែនជាយូរមកហើយ ដោយសង្កត់ធ្ងន់ថាជម្លោះនេះមិនមានដំណោះស្រាយយោធានោះទេ៕
