ភ្នំពេញ៖ នៅថ្ងៃពុធ ទី១៥ ខែ ឧសភា ឆ្នាំ២០២៤ លោក វ៉ាន់ ហ៊ាង នាយកសាខាកាកបាទក្រហមកម្ពុជា ខេត្តពោធិ៍សាត់ និងសហការី ព្រមទាំងមានការចូលរួមពីអាជ្ញាធរមូលដ្ឋាន និងអនុសាខាបានអញ្ជើញចុះសួរសុខទុក្ខ និងនាំយកអំណោយមនុស្សធម៌របស់កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ជាប្រធាន ទៅផ្តល់ជូនគ្រួសារប្រជាពលរដ្ឋរងគ្រោះដោយសារខ្យល់កន្ត្រាក់ ចំនួន៥០គ្រួសារ រស់នៅក្នុងឃុំបឹងកន្ទួត ១៥ គ្រួសារ ឃុំអូរសណ្ដាន់ ២០ គ្រួសារ និង ឃុំស្នាអន្សា ១៥ គ្រួសារ។
នាឱកាសនោះ លោក វ៉ាន់ ហ៊ាង នាយកសាខាបាននាំមកនូវប្រសាសន៍ផ្តាំផ្ញើសាកសួរសុខទុក្ខពីសំណាក់ ឯកឧត្តមខូយ រីដា ប្រធានគណៈកម្មាធិការសាខា និងពីសំណាក់សម្តេច កិត្តិព្រឹទ្ធបណ្ឌិតប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះគ្រួសាររងគ្រោះដោយក្តីនឹករឭកបំផុត និងចូលរួមសោកស្តាយដែលធ្វើឱ្យខូចខាតផ្ទះសំបែង របស់បងប្អូនដែលជានិច្ចកាលសម្តេចតែងតែគិតគូរពីសុខទុក្ខរបស់បងប្អូនប្រជាពលរដ្ឋជួបការលំបាក អ្នកមានជំងឺ ចាស់ជរា ស្ត្រីមេម៉ាយកូនច្រើនក្នុងបន្ទុក ជនងាយរងគ្រោះ និង ជនរងគ្រោះដោយគ្រោះមហន្តរាយផ្សេងៗ ដោយមិនប្រកាន់រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ ពោលគឺ ទីណាមានទុក្ខលំបាក ទីនោះមានកាកបាទក្រហមកម្ពុជា និងផ្តាំផ្ញើដល់បងប្អូនប្រជាពលរដ្ឋទាំងអស់នៅពេលដែលមានភ្លៀងធ្លាក់សូមមេត្តាប្រុងប្រយ័ត្ន ផ្គររន្ទះ និងកាត់បន្ថយការប្រើប្រាស់ថង់ផ្លាស់ស្ទីក ប្រកាន់យកនូវ អនាម័យល្អ៕
