អគ្គលេខាធិការអង្គការសហប្រជាជាតិ លោក Antonio Guterres បានថ្លែងនៅក្នុងកិច្ចប្រជុំក្រុមប្រឹក្សាសន្តិសុខ អំឡុងពេលមហាសន្និបាតអង្គការសហប្រជាជាតិលើកទី៧៩ នៅទីស្នាក់ការអង្គការសហប្រជាជាតិនៅទីក្រុងញូវយ៉ក សហរដ្ឋអាមេរិក កាលពីថ្ងៃទី២៧ ខែកញ្ញា ឆ្នាំ២០២៤ ដោយលើកទ្បើងថា បញ្ហានៅហ្គាហ្សា គឺជាបញ្ហាគន្លឹះក្នុងការបញ្ចប់អំពើហិង្សានៅទូទាំងមជ្ឈឹមបូព៌ា។
លោក Antonio Guterres ក៏បានព្រមានអំពីការកើនឡើងនៃអំពើហិង្សានៅមជ្ឈិមបូព៌ា បើយើងមិនបញ្ចប់អំពើហិង្សានៅហ្គាហ្សា ព្រោះវាជាគន្លឹះក្នុងការបញ្ចប់បញ្ហា។
លោក Guterres បានថ្លែងបែបនោះ នៅឯកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិស្តីពីប៉ាឡេស្ទីន ដែលត្រូវបានស្នើទ្បើងដោយអាល់ហ្សេរី ខណលោកសង្កត់ធ្ងន់ថា សង្រ្គាមនៅក្នុងប្រទេសលីបង់អាចនាំឱ្យមានការកើនឡើងបន្ថែមទៀតដែលពាក់ព័ន្ធនឹងមហាអំណាចខាងក្រៅ។
ដោយបង្ហាញការគាំទ្រចំពោះបទឈប់បាញ់បណ្តោះអាសន្នសម្រាប់ការផ្តល់ជំនួយនៅក្នុងប្រទេសលីបង់ ប្រធានអង្គការសហប្រជាជាតិបាននិយាយថា យើងត្រូវការបទឈប់បាញ់នេះឥឡូវនេះ និងបន្ទាន់បំផុត ។
លោក Guterres បានននិយាយថា យើងត្រូវតែចៀសវាងសង្គ្រាមក្នុងតំបន់នៅគ្រប់ការចំណាយទាំងអស់។ លោកបន្តថា “Gaza នៅតែជាចំណុចកណ្តាលនៃអំពើហិង្សា”។ ដោយបញ្ជាក់ថា ការបំផ្លិចបំផ្លាញដែលបង្កឡើងដោយការទម្លាក់គ្រាប់បែកឥតឈប់ឈរនិងអរិភាពនៅតែបន្ត លោកបាននិយាយថា “Gaza គឺជាគន្លឹះដើម្បីបញ្ចប់” អំពើហិង្សាក្នុងតំបន់។
អ៊ីស្រាអែលបានវាយលុកប្រទេសលីបង់ចាប់តាំងពីព្រឹកថ្ងៃចន្ទ ដោយបានសម្លាប់មនុស្សជាង ៧០០ នាក់ និងរបួសជិត ២.២០០ នាក់ផ្សេងទៀត នេះបើយោងតាមតួលេខដែលចេញផ្សាយដោយក្រសួងសុខាភិបាលលីបង់។ ក្រសួងក៏បាននិយាយផងដែរថាចំនួនអ្នកស្លាប់នៅក្នុងប្រទេសលីបង់ចាប់តាំងពីខែតុលាឆ្នាំមុនគឺ ១,៥៤០ បន្ថែមពីលើមនុស្សជាង ៧៧,០០០ នាក់ដែលត្រូវបានផ្លាស់ទីលំនៅពីភាគខាងត្បូងនិងភាគខាងកើតនៃប្រទេស។
ក្រុមហេសបូឡា និងអ៊ីស្រាអែលបានចូលរួមនៅក្នុងសង្គ្រាមឆ្លងព្រំដែនចាប់តាំងពីការចាប់ផ្តើមនៃសង្រ្គាមរបស់អ៊ីស្រាអែលនៅលើតំបន់ហ្គាហ្សា ដែលបានសម្លាប់មនុស្សជាង ៤១,៥០០ នាក់ ដែលភាគច្រើនជាស្ត្រី និងកុមារ បន្ទាប់ពីការវាយប្រហារឆ្លងព្រំដែនដោយក្រុមហាម៉ាស់កាលពីថ្ងៃទី ៧ ខែតុលា៕
