នាយករដ្ឋមន្ត្រីអ៊ីស្រាអែល លោក Benjamin Netanyahu បានបង្ហាញពីឆន្ទៈរបស់លោកក្នុងការបង្កើនការវាយលុកប្រឆាំងនឹងក្រុម Hezbollah ដែលមានមូលដ្ឋាននៅលីបង់ បន្ទាប់ពីមេដឹកនាំក្រុមនេះត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែល។
លោក Netanyahu បានថ្លែងបែបនេះបន្ទាប់ពីការស្លាប់របស់លោក Hassan Nasrallah ។ លោកថាប្រទេសរបស់លោកបានកសាងសមិទ្ធិផលដ៏អស្ចារ្យ ប៉ុន្តែការងារនេះនៅតែមិនទាន់ត្រូវបានបញ្ចប់បៅទ្បើយទេ។ លោកក៏បាននិយាយផងដែរថា ការលុបបំបាត់ Nasrallah គឺជាលក្ខខណ្ឌចាំបាច់ក្នុងការសម្រេចបាននូវគោលបំណង ដែលអ៊ីស្រាអែលបានកំណត់។
លោកបានបន្តថា ការបញ្ជូនអ្នកស្រុកនៅភាគខាងជើងទៅផ្ទះគេវិញដោយសុវត្ថិភាព និងការផ្លាស់ប្តូរតុល្យភាពអំណាចក្នុងតំបន់គឺជាគោលបំណងរបស់អ៊ីស្រាអែល។
លោក Netanyahu ក៏បាននិយាយផងដែរថា ប្រទេសរបស់លោកស្ថិតក្នុង អ្វីដែលនឹងត្រូវបានគេមើលឃើញថាជាចំណុចរបត់ប្រវត្តិសាស្ត្រ។ លោកបានបញ្ជាក់បន្ថែមថា ការដោះស្រាយការវាយប្រហារចំពោះក្រុម Hezbollah ដែលបង្ហាញពីសាមគ្គីភាពជាមួយក្រុមអ៊ីស្លាមប៉ាឡេស្ទីន Hamas នឹងនាំឱ្យមានការដោះលែងចំណាប់ខ្មាំងដែលត្រូវបានឃុំខ្លួននៅតំបន់ Gaza Strip។
ការវាយប្រហាររបស់អ៊ីស្រាអែលលើលីបង់បានបន្តសូម្បីតែបន្ទាប់ពី Nasrallah ត្រូវបានសម្លាប់។ ក្រសួងសុខាភិបាលលីបង់និយាយថា មនុស្ស៣៣នាក់បានស្លាប់ និង១៩៥នាក់ផ្សេងទៀតរងរបួសក្នុងការវាយប្រហារកាលពីថ្ងៃសៅរ៍កន្លងទៅ។
ក្តីបារម្ភនៃការពង្រីកជម្លោះកាន់តែខ្លាំងឡើង ខណៈដែលក្រុមហេសបូឡា បាននិយាយថា ខ្លួននឹងបន្តការប្រយុទ្ធរបស់ខ្លួនប្រឆាំងនឹងអ៊ីស្រាអែល ដោយគាំទ្រតំបន់ហ្គាហ្សា និងប៉ាឡេស្ទីន និងការពារប្រទេសលីបង់៕
