យោងតាមស្ថិតិក្រសួងទេសចរណ៍បានឲ្យដឹងថា រយពេល ៤ ថ្ងៃ នៃពិធីបុណ្យចូលឆ្នាំថ្មីប្រពៃណីជាតិខ្មែរ មានប្រជាពលរដ្ឋខ្មែរ និងទេសចរបរទេសដើរលេងកម្សាន្តក្នុងក្របខណ្ឌទូទាំងប្រទេសសរុបប្រមាណ ២១.៧០ លាននាក់ ក្នុងនោះភ្ញៀវទេសចរបរទេស ប្រមាណ ១១ ម៉ឺននាក់។
ក្រសួងទេសចរណ៍ក៏បានធ្វើកំណត់សម្គាល់ថា ពិធីបុណ្យចូលឆ្នាំថ្មីប្រពៃណីជាតិខ្មែរឆ្នាំ២០២៤ នេះ ប្រជាពលរដ្ឋដើរលេងកម្សាន្តក្នុងក្របខណ្ឌទូទាំងប្រទេសមានចំនួនកើនឡើងច្រើន ដោយសារតែរយៈពេលនៃពិធីបុណ្យមានរហូតដល់៤ថ្ងៃ ក្នុងពេលដែលពិធីបុណ្យចូលឆ្នាំ ប្រពៃណីជាតិឆ្នាំ២០២៣ មានរយៈពេលត្រឹមតែ៣ថ្ងៃប៉ុណ្ណោះ ខណដែលមានប្រជាពលរដ្ឋដើរលេងកម្សាន្តក្នុងក្របខណ្ឌទូទាំងប្រទេសមានប្រមាណ តែ ១៣.១៣ លាននាក់ប៉ុណ្ណោះ។
ក្រៅពីនេះ គ្រប់រាជធានី ខេត្តមានការរៀបចំសង្ក្រានឆ្នាំថ្មី ដែលជាព្រឹត្តិការណ៍ដែលមានការទាក់ទាញ និងងាយស្រួលដល់បងប្អូនប្រជាពលរដ្ឋចូលរួមកម្សាន្ត។
ក្រសួងក៏បានបញ្ជាក់ផងដែរថា ក្នុងចំណោមប្រជាពលរដ្ឋដែលបានដើរលេងកម្សាន្តក្នុងខេត្តខាងលើ គឺមានតែប្រមាណ ៣០% ប៉ុណ្ណោះដែលបានស្នាក់នៅលើសពីមួយយប់ឡើងទៅ នៅកន្លែងកម្សាន្ត។ ក្រសួងបន្ថែមឲ្យដឹងដែរថា ចំនួនភ្ញៀវទាំងជាង ២១ លាននាក់ខាងលើនេះ គឺរដ្ឋបាលរាជធានីខេត្ត រាប់បញ្ចូលចំនួនភ្ញៀវទេសចរដែលធ្វើដំណើរកម្សាន្តនៅតាមរមណីយដ្ឋាន និងគោលដៅទេសចរណ៍ទូទាំងប្រទេស និងចំនួនបងប្អូនប្រជាជនដែលបានចូលរួមលេងកម្សាន្តនៅតាមទីតាំងដែលមានការរៀបចំកម្មវិធីសង្ក្រាន្ត ព្រមជាមួយបងប្អូនប្រជាពលរដ្ឋដែលលេងកម្សាន្តនៅតាមភូមិស្រុក និងកន្លែងជួបជុំនានាផងដែរ៕
