ក្រុម Hezbollah នៃប្រទេសលីបង់ បានប្រកាសពីដំណាក់កាលថ្មីក្នុងការប្រឈមមុខដាក់គ្នាជាមួយអ៊ីស្រាអែល ។ នេះបើយោងតាមសេចក្តីថ្លែងការណ៍របស់ចលនានេះ នៅលើបណ្តាញ Telegram ។
សេចក្តីថ្លែងការណ៍ បានបន្ថែមថា នឹងមានការប្រឈមមុខដាក់គ្នាកាន់តែខ្លាំង នៅប៉ុន្មានថ្ងៃខាងមុខនេះ ជាមួយអ៊ីស្រាអែល ដែលមិនអាចប្រកែក ។
ចលនានេះ បានបន្តទៀតថា ទាហាន និងមន្ត្រីអ៊ីស្រាអែលយ៉ាងហោចណាស់ ៥៥ នាក់ស្លាប់ និងរបួសជាង ៥០០ នាក់ទៀតក្នុងការប្រយុទ្ធគ្នានៅប្រទេសលីបង់ ចាប់តាំងពីដើមខែតុលា រួមទាំងបរិក្ខារយោធាមួយចំនួនទៀតផងដែរ។
គួរបញ្ជាក់ថា កាលពីថ្ងៃទី ២៣ ខែកញ្ញា អ៊ីស្រាអែល បានបើកប្រតិបត្តិការ Northern Arrows ប្រឆាំងនឹងអង្គភាព Hezbollah ក្នុងប្រទេសលីបង់ អំឡុងពេលដែលខ្លួនកំពុងធ្វើការវាយប្រហារតាមអាកាសដ៏ធំប្រឆាំងនឹងទីតាំងយោធារបស់ចលនានេះ។ ជាលទ្ធផលនៃការវាយប្រហារ បានសម្លាប់អគ្គលេខាធិការ Hezbollah លោក Hassan Nasrallah នៅទីក្រុង Beirut កាលពីថ្ងៃទី ២៧ ខែកញ្ញា ៕
