គៀវ៖ ការវាយប្រហារដោយកាំជ្រួចមីស៊ីល កាំភ្លើងធំ និងយន្តហោះគ្មានមនុស្សបើករបស់រុស្ស៊ី កំពុងកើនឡើងនៅគោលដៅភាគខាងកើត និងភាគខាងត្បូងអ៊ុយក្រែន ខណដែលមហាអំណាចសេដ្ឋកិច្ចពិភពលោក សន្យាពង្រឹងសមត្ថភាពយោធារបស់ទីក្រុងគៀវ ដោយផ្តោតលើការការពារដែនអាកាស។
ក្រុមប្រទេស G7 បានសន្យានឹងផ្គត់ផ្គង់តាមតម្រូវការបន្ទាន់របស់អ៊ុយក្រែន បន្ទាប់ពីប្រធានាធិបតីលោក Volodymyr Zelenskyy បានស្នើសុំក្នុងកិច្ចប្រជុំនៃប្លុកនេះសម្រាប់រថក្រោះទំនើប កាំភ្លើងធំ និងអាវុធរយៈចម្ងាយឆ្ងាយប្រឆាំងនឹងការឈ្លានពានដ៏សាហាវរបស់រុស្ស៊ី។
ទន្ទឹមនោះ លោក Zelenskyy ក៏បានជំរុញ G7 ឱ្យជួយទីក្រុងគៀវ ទទួលបានឧស្ម័នធម្មជាតិបន្ថែមចំនួន ២ ពាន់លានម៉ែត្រគូប ក្រោយមានការខ្វះខាតថាមពលដ៏ធ្ងន់ធ្ងរ ខណដែលប្រជាជនរាប់លាននាក់គ្មានថាមពលប្រើប្រាស់ ក្នុងរដូវរងានេះ។
ដោយឡែក រដ្ឋមន្ត្រីការបរទេសសហភាពអឺរ៉ុប បានព្រមព្រៀងគ្នា កាលពីថ្ងៃច័ន្ទ ដើម្បីដាក់ប្រាក់ចំនួន ២ ពាន់លានអឺរ៉ូ (២.១ ពាន់លានដុល្លារ) ទៅក្នុងមូលនិធិដែលប្រើសម្រាប់ចំណាយលើការគាំទ្រផ្នែកយោធាអ៊ុយក្រែន និងការបញ្ចូលទឹកប្រាក់បន្ថែមទៀតប្រហែលជាអាចធ្វើទៅបាននៅដំណាក់កាលក្រោយៗ៕